香港-第一次揸寶馬 小班搵丁師傅補鐘

班德禮(綠帽)今朝捉實丁冠豪(藍帽)起勢咁問問題，明晚尾場合作馬「好運寶馬」絕對有備而來。

英國好手班德禮上個月只係贏得1W，成績遇到阻滯，可幸近3期賽事連番有馬跑入位置，算叫有點起色，回看明晚谷戰，騎者騎足9場，且看支持度急增下，能否把握機會重振雄風。

其中守尾門的丁廐坐騎「好運寶馬」，今戰將遇上「伊臣」及「股票傳奇」兩匹熱門，惟亦不能抹殺小班贏馬機會，事關「好運寶馬」季初能在沙田大場輕取「樂滿貫」贏馬，兼且上仗都係輸近畀「加州星球」同「心之行」等高手而已，今戰回爭曾上名的谷中1200米，論卡士一定夠殺。

可是「好運寶馬」因在去年12月初在晨課流過鼻血關係，所有操練工夫被逼由頭做起，而休後一共進行17課快工夫，難得頂得住辣操，足證狀態已全面回復，而由於騎開「好運寶馬」的史卓豐已離港，話唔定係丁師傅有心益小班。今早耙地空檔，騎練特登在機坪開一輪搏殺會議，頓時成為焦點，見騎者動作多多，不斷向丁師傅問功課，看來也不想失威，糟蹋練者一番美意！