香港 – 安仔停賽 雷神接手呢兩駒隨時爆樽！

今期莫雷拉接手田泰安兩匹騎開嘅「健康馬」同埋「閃電」。

田泰安喺剛戰谷草夜賽以及今期沙田日賽被罰停賽，安仔今季被罰次數都較少，但今期日賽，呢個停賽期隨時有損失！事關今期莫雷拉接手兩匹安仔上場騎開而又接近取勝邊緣嘅賽駒，就好似第5場「健康馬」同埋第9場「閃電」，隨時畀人連爆兩個樽呀！

「健康馬」季內出戰6次，最近3仗喺田泰安胯下出戰田草1600米至1800米路程，均跑入三甲位置，不過上兩仗「健康馬」形勢較為被動，故後上不及只得位置，為趕及盡快贏夠數，鄭俊偉今次都唔等，請來莫雷拉幫手，騎者亦親自跳咗兩課3段快跳了解馬性，今次抽得3檔好位，隨時一攻而破，為練者取得寶貴四班頭馬。

至於第9場三班1200米泥地「閃電」上仗出戰贏馬路程，沿途莫雷拉坐騎「萬眾力得」領放甚韌，最後「閃電」追唔切，只以短馬頭位僅敗得亞軍，今場沈集成安排「閃電」打王牌出擊，換上莫雷拉執韁，操足而臨，係呢場爭勝要角之一。